اسلام آباد جمعیت علماء اسلام (جے یو آئی ) کے سربراہ مولانا فضل الرحمان نے کہا ہے کہ الیکشن ہونے ہیں ، ہم 9 اگست کو حکومت چھوڑ رہے ہیں ، نگران حکومت بنے گی اس کی ذمہ داری ہو گی کہ الیکشن کرائے۔
مولانا فضل الرحمان نے قبائلی جرگہ سے خطاب کرتے ہوئے کہا کہ جرگہ نے مختلف اضلاع میں دہشتگردی کے واقعات پر تشویش کا اظہار کیا ہے اور سانحہ باجوڑ کے زخمیوں کی صحت یابی کیلئے دعاگو ہے، جرگہ میں 9 مئی کے واقعات کو ریاست کیخلاف سازش قرار دیا گیا اور جرگہ مطالبہ کرتا ہے ان واقعات میں ملوث افراد کو سزا دی جائے۔
سربراہ جے یوآئی کا کہنا تھا کہ ایک طرف ہماری تاریخی جدوجہد، قربانیاں اور خون سے لکھا ماضی ہے، دوسری طرف وہ سازشیں ہیں جو باہر کی قوتوں نے کی ہیں۔
انہوں نے کہا کہ ہمارے اپنے لوگ بھی اس سازش میں شامل ہوئے اور اس سازش نے ہماری جدوجہد کونقصان پہنچایا، یہ ایک جنگ ہے جو جاری رہے گی۔
انکا کہنا تھا کہ انتخابات ہونے ہیں، انتخابی ماحول میں وحدت کو برقرار رکھنا بڑا کام ہے، سیاستدان ملکی مفاد، آئین اور قانون کوسمجھتے ہیں، ریاستی ادارے سیاسی لوگوں کو ساتھ نہیں ملائیں گے تو فیصلوں کوعوامی تائید نہیں ملے گی۔
ان کا مزید کہنا تھا کہ پاکستان اور افغانستان کا استحکام ایک دوسرے کی ضرورت ہے، معیشت کی تباہی اور سی پیک کوروکنا عالمی ایجنڈا ہے۔
Comments
Post a Comment